Gschupfte Nudla

Oft denk i no an mei Muatr,
Wia se kocht hot eisr Fuatr.
Mir erzählad jetzt mit nand,
was mer alls so gsea hand.

Gschupfte Nudla, saure Kuttla,
Häberlesmuaß, a Flädlasuppa.
Grondbira mit Mill ond Käs,
an Moscht vom Kellr gar it räs.

Am Mondig do geits Mauldäscha,
Dienstig Grondbira oh gwäscha.
Eiser Bauch und eiser Maga,
kennat alles zsemmat vertraga.

Am Migda geit´s no Holdermuaß,
Donschdig von dr Sau an Fuaß.
ond no muasch no gegs dein Willa,
da ganza Duschd mit Wasser stilla.

Am Freitig eaß mr Kässchbätzla,
Samstig Mostkiachla vom Schätzla.
Es druckt im Ranza, s´ pfludrat d´Hos,
am Heisle goht´s erscht richtig los.

Am Sonntig erschd, do schmeckt es mir,
Suppa, Brot, ond au viel Bier.
Freassa, Saufa nochher schpeia,
Kataschbiela s´ Geld nauskeia.